النوم سلطان

Posted 7 February, 2016 by Nancy Elsohafy in عربي / 4 Comments

sleeping-1159279_1920
صدق اللي قال النوم سلطان
من يوم ما وعينا عالدنيا و النوم ده شئ أساسي
في أول أيامنا في الدنيا بنقضيها كلها نوم، كل ما نكبر حبه حبه النوم بيقل حته حته
و نيجي بقي لأيام المدارس
نلاقي نفسنا نفضل نقاوم
مش عاوزين ننام عاوزين نعيش في يومنا كمان
و هوبا تلاقي نفسك في الجامعه
خروج و فسح و انطلاق
و محدش يقولك خد و هات
تعيشها بقي بطولها و عرضها
و أيام الامتحانات معسكر مذاكره
نموت و نكون عاوزين ننام
خايفين ليروح علينا الإمتحان
و ننجح و نخلص و نسهر و نهجص
تلاقي نفسك بقيت موظف
و النوم يحطك في أصعب موقف
يا تنام بدري و تروح مصحصح
يا تسهر و الصبح تقوم مزوغ
النوم دلوقتي مبقاش اختيار
لازم أساسي مفيش هزار
و تكبر و تعلى و تنجح أكتر
و تلاقي بقي عندك فكر أكبر
نومك يبتدي ميبقاش صافي
و لا سهل تنام في الوقت الإضافي
تخش سريرك ….
والفكر يجيلك….
بكره كذا و بعده كذا، لازم ازود هنا و أقلل هنا
و ده يابن آدم اللي إسمه الهم
أول معرفتك بيه تحس تعب ..مش مهم
تكبر و تحب و تفتح بيت
و همك معاك زي ظل الحيط
النوم اختلف مبقاش زي الأول
ده التقليب في السرير بقى أكتر و يطول
تصحى الصبح كأنك منمتش
تخلص الجرنان و كأنك مفهمتش
تصدع و تقريف من غير مناسبه
ولا العيل السخن اللي عنده حصبه
طب و بعدين؟
يفضل همنا يكبر معانا
في صحيانك و نومك وفي كل وقت
تلاقي نفسك حتنهار بجد
و تقول يا ريتني نمت زمان
اما كان الواحد مخه روقان
تصلي، تدعي ، تاخد منوم
همك صاحي..باصصلك مبلم
لحد أما تفهم إنه خلاص
همك ده بقي أفضل صديق
لازق جنبك في الفرح و الضيق
و ده يا مؤمن حال الكل
من غير ما تكيد ولا تحسد بغل
محدش منا خالي الهموم
بس في اللي يعرف يخبي و يصون
صون همك و حزنك و كل اللي شاغلك
وشيله كله…و ارميها لربك
حيشيل عنك و يخف حملك
و كتافك تتفرد و يشد أزرك
و ييجي أخيرا آخر محطه
تصدق إنها بردو فيها نوم؟!
نوم مريح في حضن ملايكه
تزفك للجنه و الدنيا سالكه
نوم الراحه و السعد و الهنا
تلاقي نفسك نايم فرحان
تصحى تلاقي نفسك مع أحباب زمان
دي ماما و ده بابا و ده ابن الجيران
آخرتنا حلوه بعون الله
و هو ده الوعد الحق
تفارق همك اللي ملازمك طول السنين
و تقابل ربك ذو الوجه الكريم

Tags:


4 Responses to “النوم سلطان”

  1. Sherrie B

    جميلة اوي يا نانسي
    بس دلوقتي انا عايزة انام و في نفس الوقت مفيش وقت الواحد ينام، العمر قصير

Leave a Reply